Oliy Majlis Senati Kengashi Prezident taqdimnomasiga binoan Baxtiyor Islomovni Oliy sud raisi lavozimidan ozod etdi. Yangi raislikka Robaxon Maxmudova nomzodi ilgari surildi.
O‘zbekiston sud tizimi rahbariyatida jiddiy kadrlar almashinuvi yuz bermoqda. Prezident Shavkat Mirziyoyev Oliy Majlis Senatiga Baxtiyor Jahongirovich Islomovni O‘zbekiston Respublikasi Oliy sudi raisi lavozimidan ozod etish to‘g‘risida taqdimnoma kiritdi. Bu haqda davlat rahbarining matbuot xizmati xabar berdi.
Ushbu masala 18-iyun kuni Toshkentda, Oliy Majlis Senati raisi Tanzila Narbayeva raisligida o‘tgan Senat Kengashining navbatdagi yig‘ilishida ko‘rib chiqildi. Yig‘ilish yakunida Senat Kengashi Baxtiyor Islomovning vakolatlarini muddatidan oldin tugatish to‘g‘risida tegishli qaror qabul qildi. Ma’lumot o‘rnida, u 2022-yilning avgust oyidan buyon (besh yillik muddat bo‘yicha 2027-yilgacha) Oliy sudga raislik qilib kelayotgan edi, unga qadar esa Prezident maslahatchisi bo‘lib ishlagan. Uning keyingi ish joyi haqida hozircha ma’lumot berilmagan.
Shu bilan bir vaqtda, davlat rahbari Oliy Majlis Senatiga yangi taqdimnoma ham kiritdi. Unga ko‘ra, O‘zbekiston Respublikasi Oliy sudi raisi lavozimiga Robaxon Anvarovna Maxmudova nomzodi taklif etildi. Amaldagi qonunchilikka muvofiq, ushbu nomzod yaqin vaqt ichida yuqori palata a’zolari (senatorlar) tomonidan ko‘rib chiqiladi va tasdiqlanadi.
Izohlar
Hozircha izohlar yo‘q