Vashingtondagi UFC turnirida Jastin Getji Iliya Topuriyani to‘rtinchi raunddan so‘ng texnik nokaut evaziga mag‘lub etdi va chempionlik kamarini qo‘lga kiritdi.
AQSh poytaxti Vashington shahrida o‘tkazilgan UFC turnirining markaziy jangida yengil vazn toifasidagi yangi chempion nomi ma’lum bo‘ldi. Mag‘lubiyatsiz kelayotgan amaldagi chempion Iliya Topuriya hamda vaqtinchalik kamar sohibi Jastin Getji o‘rtasidagi uchrashuv muddatidan oldin yakunlandi va Getjining g‘alabasi bilan tugadi.
Chempionlik jangi to‘rtinchi raunddan so‘ng to‘xtatildi. Topuriya o‘tkazib yuborilgan og‘ir zarbalar oqibatida beshinchi raundga chiqa olmasligi ma’lum bo‘ldi. Shifokorlar va sportchining burchagi uchinchi raunddan keyin Iliyaning ko‘rish qobiliyatida muammolar boshlanganini, to‘rtinchi raund yakunida esa uning jismoniy holati yanada og‘irlashganini qayd etishdi.
Shu tariqa, 37 yoshli Jastin Getji yengil vazn toifasida UFC chempionlik kamarini rasman qo‘lga kiritdi. Uning hisobidagi ko‘rsatkich endi 28 g‘alaba va 5 mag‘lubiyatni tashkil etmoqda. Mazkur muvaffaqiyatsizlik Iliya Topuriyaning professional MMA faoliyatidagi birinchi mag‘lubiyat bo‘ldi (17 g‘alaba, 1 mag‘lubiyat).
Turnirning ikkinchi asosiy jangida fransiyalik Siril Gan og‘ir vazn toifasidagi vaqtinchalik chempionlik kamari uchun kechgan bahsda braziliyalik Aleks Pereyrani kuchli zarba evaziga nokautga uchratdi va g‘alaba qozondi.
Izohlar
Hozircha izohlar yo‘q