Isroil vazirlari Itamar Ben-Gvir va Betsalel Smotrich Hizbulloh hujumlariga javoban Livanni elektrdan uzish va Bayrutdagi binolarni vayron qilishga chaqirdi.
Milliy xavfsizlik vaziri Itamar Ben Gvir agar Livan ma’murlari Hizbulloh harakatini jilovlay olmasa, mamlakat janubidagi hududlar Isroil uchun maxsus xavfsizlik zonasiga aylanishi kerakligini ta’kidladi. Uning fikricha, qo‘shni davlatni elektr energiyasidan uzib qo‘yish, muhim infratuzilmalarini yo‘q qilish va har qanday terrorchilik harakatiga javoban ularning o‘zi azob chekishini amalda ko‘rsatish zarur. Shuningdek, vazir Isroil bosh vaziri Binyamin Netanyaxuni AQSh ma’muriyati bilan muloqotda qat’iyroq bo‘lishga va Livandagi harbiy harakatlarni to‘liq tiklash haqida ma’lum qilishga chaqirdi.
Moliya vaziri Betsalel Smotrich ham Hizbulloh tashkiloti tomonidan uchirilayotgan portlovchi dronlar xavfiga chek qo‘yish lozimligini bildirdi.
U mudofaa tizimini optimal darajada tayyorlash maqsadida deyarli 2 milliard isroil shekeli miqdoridagi maxsus byudjetni tasdiqlaganini ma’lum qildi. Vazir poytaxt Bayrutga beriladigan zarbalarni keskin oshirish, har bir dron hujumiga javoban o‘nta binoni qulatish strategiyasini yoqlab chiqdi. Isroil armiyasi shtabi boshlig‘i Eyal Zamir ham kabinet yig‘ilishida Livan poytaxtiga havo hujumlarini qayta boshlashni talab qildi.
Ma’lumot o‘rnida aytish joizki, Isroilning bombardimonlari oqibatida shu paytgacha qariyb 3200 kishi halok bo‘lgan, 1.6 milliondan ortiq aholi o‘z uy joyini tashlab ketishga majbur bo‘lgan.
