Samarqandda Saida Mirziyoyeva JSST, BMT va XNNAQ rahbarlari bilan uchrashdi. Muloqot markazida — narkotahdidlarga qarshi kurash, raqamli tibbiyot va reabilitatsiya standartlari bo‘ldi.
Samarqandda o‘tayotgan xalqaro forum doirasida Saida Mirziyoyeva dunyoning yetakchi tashkilotlari rahbarlari bilan uchrashib, narkotahdidlarga qarshi kurash bo‘yicha global hamkorlikni muhokama qildi. JSST bosh direktori Tedros Gebreyesus bilan o‘tgan muloqotda O‘zbekiston sog‘liqni saqlash tizimidagi islohotlar, raqamli tibbiyotni rivojlantirish va farmatsevtika bozorini tartibga solish masalalariga to‘xtalib o‘tildi. Narkologik davolash va bemorlarni reabilitatsiya qilishning zamonaviy tizimlarini yaratish hamkorlikning ustuvor yo‘nalishi etib belgilandi.
Shuningdek, Saida Mirziyoyeva BMT Giyohvand moddalar va jinoyatchilikka qarshi kurashish boshqarmasi rahbari o‘rinbosari Bo Matiasen bilan muzokaralar o‘tkazdi. Uchrashuvda narkotahdidlarga qarshi kurash, uyushgan jinoyatchilik va korrupsiyaga qarshi turishda sheriklikni kengaytirish istiqbollari ko‘rib chiqildi. Samarqand forumini doimiy muloqot maydoniga aylantirish hamda O‘zbekistonning BMT Jinoyatchilikning oldini olish komissiyasiga saylanishi amaliy aloqalarni yangi bosqichga olib chiqishi ta’kidlandi.
Xalqaro narkotiklarni nazorat qilish qo‘mitasi (XNNAQ) bosh kotibi Stefano Berterame bilan o‘tgan uchrashuvda milliy nazorat tizimini takomillashtirish masalalari ko‘tarildi. O‘zbekiston uchun bu sohada xalqaro ekspertlar bahosi muhim ahamiyatga ega. Narkotahdidlarga qarshi kurash samaradorligini oshirish maqsadida tahliliy va laboratoriya bazasini rivojlantirish, nazoratning raqamli vositalarini joriy etish va soha mutaxassislarini tayyorlash bo‘yicha kelgusidagi qadamlar kelishib olindi.
