Ummon dengizining sharqiy qismida AQSH harbiy-dengiz kuchlarining 14 ta kemadan iborat zarbdor guruhi joylashtirildi. Mazkur guruh aviatsiya tashuvchi kema va raketa esminetslari orqali hududda dengiz blokadasini o‘rnatishi mumkin.
AQSH harbiy-dengiz kuchlari 14 ta jangovar kemadan iborat yirik birlashmani Hormuz bo‘g‘oziga yaqin bo‘lgan Arab dengizi hududiga joylashtirdi. AQSH Harbiy-dengiz instituti ma’lumotlariga ko‘ra, guruh tarkibida «USS Abraham Lincoln» aviatsiya tashuvchi kemasi, to‘qqizta raketa esminetsi va uchta yirik desant kemasi bor. Ushbu kuchlar mintaqadagi asosiy dengiz yo‘llarini nazorat qilish va zarur bo‘lganda yuk tashuvlarini blokada qilish maqsadida to‘plangan.
Hozirda Amerika aviatsiya tashuvchi kemasi Ummon qo‘ltig‘ida bo‘lib turibdi, bu operatsiya boshlanganidan buyon AQSH kuchlarining Fors qo‘ltig‘iga eng yaqin masofaga kelishidir. AQSH Markaziy qo‘mondonligi (CENTCOM) bergan tushuntirishga ko‘ra, o‘rnatilayotgan nazorat choralari faqat harbiy maqsadlarga qaratilgan. Mintaqadagi neytral davlatlar portlariga yo‘l olgan savdo kemalari va tankerlar uchun harakatlanish erkinligi kafolatlanadi.
