Toshkentdagi xususiy klinikada bola o‘limi bo‘yicha sud hukmi o‘qildi

Sud 2025-yilning avgustida xususiy klinikada bola o‘limi bo‘yicha shifokorlarni aybdor deb topdi. Tergov jarayonida tibbiyot muassasasidagi jiddiy qoidabuzarliklar, xususan, reanimatsiya bo‘limining yo‘qligi aniqlandi.

Toshkentdagi xususiy tibbiyot markazlaridan birida sodir bo‘lgan fojiali voqea — kichik yoshli bemorning vafoti bo‘yicha sud jarayoni yakunlandi. O‘tgan yilning avgust oyida o‘tkazilgan oddiy va odatiy sanalgan adenoidektomiya (adenoidlarni olib tashlash) operatsiyasi bola uchun o‘lim bilan yakunlangandi.

Sud-tibbiy ekspertiza xulosasiga ko‘ra, o‘limga operatsiya vaqtida yuzaga kelgan asfiksiya — qon bilan traxeya va bronxlarning bekilib qolishi sabab bo‘lgan.

Sud majlisida klinikada tashkiliy jihatdan jiddiy kamchiliklar mavjudligi ma’lum bo‘ldi. Sudlanuvchilarning o‘zlari ham tergov davomida tibbiyot markazida intensiv terapiya (reanimatsiya) bo‘limi umuman bo‘lmaganini tasdiqlashdi. Bu esa asoratlar yuzaga kelgan taqdirda shifokorlarga shoshilinch yordam ko‘rsatish imkonini bermagan. Ayni paytda nazorat organlari tomonidan ushbu muassasaning faoliyati rasman to‘xtatilgan.

Sud anesteziolog-reanimatolog va LOR shifokorining harakatlarini O‘zbekiston Respublikasi Jinoyat kodeksining 116-moddasi 3-qismi (Kasb yuzasidan o‘z vazifalarini lozim darajada bajarmaslik) bilan malakaladi.

Sud hukmiga ko‘ra, har ikki shifokor aybdor deb topilib, to‘rt yil muddatga manzil-koloniyaga (koloniya-poseleniya) hukm qilindi. Shuningdek, sudlanuvchilar asosiy jazo muddatini o‘tab bo‘lgach, yana uch yil davomida jarrohlik faoliyati bilan shug‘ullanish huquqidan mahrum etildi.