Yashnobod tumanida raqamsiz Malibu boshqaruvidagi mast haydovchi nafaqat Leapmotor bilan to‘qnashdi, balki voqea joyiga kelgan xizmat vazifasini bajarayotgan xodimga zarba berdi.
Poytaxtning Yashnobod tumanida Malibu va Leapmotor ishtirokida ro‘y bergan avariya jiddiy huquqbuzarlikka ulanib ketdi. Hodisa joyiga chaqirilgan Yo‘l-patrul xizmati xodimlari Malibu haydovchisining agressiv xatti-harakatlari va davlat raqam belgilari yo‘qligiga duch kelishgan. Haydovchiga alkotester yordamida mastlik darajasini tekshirish taklif etilganda, u qonuniy talablarga bo‘ysunishdan bosh tortgan.
Vaziyat haydovchi xizmat vazifasini bajarayotgan xodimlardan biriga kutilmaganda zarba berib, uni haqorat qilganidan so‘ng yanada keskinlashdi. Huquq-tartibot idoralari xodimi uni ichki ishlar bo‘limiga borishga chaqirganda, qoidabuzar faol qarshilik ko‘rsatgan. Natijada xodimlar maxsus vositalarni qo‘llash orqali tajovuzkor shaxsni zararsizlantirishga majbur bo‘lishdi.
Hozirda mazkur holat yuzasidan Jinoyat kodeksining 219-moddasi 2-qismi (Hokimiyat vakiliga qarshilik ko‘rsatish) va 277-moddasi 3-qismi «g» bandi (Bezorilik) bilan jinoyat ishi qo‘zg‘atilgan. Qo‘lga olingan shaxs o‘z qilmishini tan olib, spirtli ichimlik ta’sirida bo‘lganini va qattiq pushaymonligini bildirgan. Yo‘l harakati xavfsizligi xizmati ushbu fuqarodan jabr ko‘rgan boshqa shaxslarni ham 102 raqamiga murojaat qilishga chaqirdi.
