Sharof-Rashidov tumani sobiq hokimi Mahmud Holbutayev korrupsiya va mansab vakolatlarini suiiste’mol qilish bilan bog‘liq jinoyat ishi bo‘yicha 11 yil muddatga ozodlikdan mahrum qilindi.
Sud materiallariga ko‘ra, 2025 yil iyun oyida Holbutayev tuman hokimligi bosh mutaxassisi bilan birga 30 ming AQSh dollari miqdorida pora olgan vaqtida qo‘lga olingan. Tadbirkordan ushbu mablag‘ 1,7 gektar maydonda, aslida maktab qurilishi uchun ajratilgan yer uchastkasida sakkizta ko‘p qavatli uy qurishga ruxsat berish evaziga talab qilingan.
Tergov ma’lumotlariga ko‘ra, olingan pullarning 10 ming dollari hokimga topshirilgan, qolgan 20 ming dollar esa bosh mutaxassisda qolgan va u zarur hujjatlarni rasmiylashtirgan.
Sud Holbutayevni o‘zlashtirish yoki rastrata, mansab vakolatlarini chetlab o‘tish, pora olish hamda yer ajratish tartibini buzish moddalari bo‘yicha aybdor deb topdi.
Bosh mutaxassis ham jinoyatda sheriklik qilganlikda aybli deb topilib, 7 yil muddatga ozodlikdan mahrum etildi.
Shuningdek, sobiq hokimga davlat hokimiyati va boshqaruv organlarida rahbarlik hamda moddiy javobgarlik lavozimlarida ishlash huquqi taqiqlandi. Unga 150 BHM miqdorida — 61,8 mln so‘m jarima ham tayinlandi.
