O‘zbekistonda hafta davomida harorat +20 darajagacha ko‘tariladi

O‘zbekistonda hafta davomida harorat +20 darajagacha ko‘tariladi. Mart oyining boshidagi nisbatan salqin ob-havodan so‘ng, respublika bo‘ylab bahoriy iliq kunlar boshlanmoqda.

Sinoptiklar ma’lumotlariga ko‘ra, 16–18-mart kunlari respublikaning katta qismida yog‘ingarchilik kutilmaydi. Yomg‘ir yog‘ish ehtimoli faqat ayrim hududlarda saqlanib qoladi: 17–18-mart kunlari Surxondaryo viloyatida, 18-mart kuni esa Qashqadaryo va Samarqand viloyatlarining alohida tumanlarida qisqa muddatli yomg‘irlar bo‘lishi mumkin.

19-mart kuni markaziy va janubi-sharqiy hududlarda vaqti-vaqti bilan yomg‘ir yog‘ishi kutilmoqda. 20-mart kuni esa yana quruq ob-havo hukmron bo‘ladi.

Haftalik harorat mart o‘rtasi uchun me’yoriy ko‘rsatkichlarga mos keladi: kechalari 5–10 daraja iliq, kunduz kunlari esa 15–20 daraja iliq bo‘ladi. Yomg‘irli kunlarda kunduzgi harorat biroz pasayib, 13–15 daraja atrofida bo‘lishi kutilmoqda. Shuningdek, 16–17-mart kunlari respublikaning shimoliy va cho‘l zonalarida shamol tezligi 13–18 m/s gacha kuchayishi mumkin.

Toshkent shahri uchun ob-havo prognozi:

Poytaxtda 16–18-mart va 20-mart kunlari yog‘ingarchiliksiz ob-havo kuzatiladi. 19-mart kuni esa vaqti-vaqti bilan yomg‘ir yog‘ishi mumkin. Harorat kechalari 5–10 daraja iliq, kunduz kunlari 17–20 daraja bo‘ladi. Faqat yomg‘irli 19-mart kuni harorat kunduzi 14–17 darajagacha biroz pasayadi.