Hafta davomida mamlakatda kuzatilgan iliq ob-havo yaqin kunlarda salqinroq va nam sharoit bilan almashadi. O‘zgidromet ma’lumotiga ko‘ra, dam olish kunlariga kelib harorat pasayadi va ayrim hududlarda yog‘ingarchilik kuzatiladi.
Juma kuni respublikaning asosiy qismi hali ham quruq va fevral uchun noodatiy darajada iliq ob-havo ta’sirida bo‘ladi. Kunduz kuni havo harorati +20…+25 darajagacha ko‘tariladi — bu ko‘rsatkichlar bahor o‘rtalariga xos.
Shu bilan birga, mamlakat shimolida vaziyat boshqacha bo‘ladi. Qoraqalpog‘iston Respublikasi va Xorazm viloyatida, shuningdek kechga tomon ayrim joylarda Buxoro va Navoiy viloyatlarida yomg‘ir yog‘ishi prognoz qilinmoqda. Bu hududlarda harorat ancha past bo‘lib, +8…+13 daraja atrofida bo‘ladi.
21-fevral, shanba kuni ob-havo o‘zgaradi. Turkmaniston hududi orqali O‘zbekistonga salqin va nam havo massalari kirib keladi. Kechasi va ertalab deyarli butun respublika bo‘ylab, Qoraqalpog‘iston va Xorazm viloyatidan tashqari, yog‘ingarchilik kutilmoqda. Ayrim joylarda momaqaldiroq bo‘lishi mumkin. Farg‘ona vodiysida yomg‘irlar asosan ertalab va kunning birinchi yarmida yog‘adi.
Tog‘li va tog‘oldi hududlarda yomg‘ir va qor, ayrim joylarda kuchli yog‘ingarchilik prognoz qilinmoqda. Sinoptiklar sel-suv toshqini hodisalari yuz berishi ehtimoli haqida ogohlantirmoqda.
Shamol tezligi 7–12 m/s gacha kuchayadi, ayrim joylarda 13–18 m/s, ba’zan 20–25 m/s gacha kuchli shamol esishi mumkin. Kunduz kuni respublika bo‘yicha harorat +9…+14 darajagacha pasayib, mavsumiy me’yor darajasiga qaytadi.
22-fevral, yakshanba kuni ob-havo barqarorlashadi. Yog‘ingarchilik to‘xtaydi, havo yana isiy boshlaydi — mamlakat bo‘yicha +15…+18 darajagacha ko‘tariladi. Kechasi va ertalab ayrim joylarda tuman tushishi mumkin.
Toshkentda juma kuni yomg‘ir kutilmaydi, kunduzgi harorat +22…+24 daraja bo‘ladi. 21-fevralga o‘tar kechasi va ertalab yomg‘ir hamda momaqaldiroq ehtimoli bor, biroq kun davomida sezilarli yog‘ingarchilik prognoz qilinmaydi. Harorat +11…+13 darajani tashkil etadi.
Yakshanba kuni poytaxtda quruq ob-havo saqlanadi. Kechasi va ertalab tuman kuzatilishi mumkin, harorat +3…+5 darajagacha pasayadi, kunduz kuni esa +14…+16 darajagacha ko‘tariladi. Shamol tezligi 3–8 m/s bo‘ladi, 20-fevral kechqurun va 21-fevral kuni ayrim paytlarda 10–12 m/s gacha kuchayishi mumkin.
